فراغ الكلمات

الفراغ في ناظرى ليس الهوة التي تطل عليها اجسادنا فتهوى داخل اللاشئ ،، وليست تلك الفجوة التى كانت تغزو قلبي منذ أشهر قلائل ، وإنما هو ذلك العجز الذي يتحول معه ملئ عينى من المرئيات وملئ عقلى من أفكار إلي لا شئ ، فتنعدم معه محاولاتك ودأبك الى المراد ويصبح حاصل جمع سعيك صفراً صحيح .

وقد تجد بعض الأصوات تحاول دوماً ان تلقنك مبادئ الصبر وفضائله على النفوس المؤمنة او تهون عليك آمله فى غدنا الخير ، فلا تجد صدي لها داخلي إلا بأن أشعر اني ما عدت مؤمنا بصبر ما ، أو حتي يهون علي فال الخير بغد لم ابصر كنهه ، وتتهاوى فى عينى محاولاتى ويترائي لي سعيى ناقصاً مبتورا .

ويتجسد أمامي الفراغ ممتلئ فأدرك أني على حافة الجنون ، نعمة الانسان هي نقمته ، فقد اصبح بناءاً على اختياره سيد نفسه ، وقد ملكه الله اختياراته ولا منأي عن معرفة نتائج تلك الاختيارات إلا باجتيازها ، وحكم عليه ناموس الكون يسرى وفقا لمقادير الاهيه - ويتجلى عبث التفكير لدى عندما لا يصبح هناك تأثير لما تؤمن به وتصبح وكأنك ترتكب أشد الجرائم عمداً رغم معرفتك المسبقه بعقوبة ارتكابها و تعاقب ذاتك على ارتكابها بأشد من العقوبات المقرره لها ، فتقع فى شرك الحمق المتناهى التى لا يجدى معه نصحاً أوارشادا ، وكأن كل ما يتفتق به ذهنك هو فراغ كلمات تمتلئ بها خلايا عقلك وتتبخر معانيها مع انفاسك الصاعده .

قرأت منذ يومين خبراً لشاب انهى حياته لعجزه عن سد رمق أقل امانيه ، وكم كانت تلك الفكرة براقه بناظرى ، فيها جلال ، وتحيطها القوة المتناهية وصاحبها يمتلك من العزم على اتخاذ قرار مصيرى بحق ( قرار فناء ) - وان كانت فى مكنونها أحمق الأفكار واشدها كفراً برحمة الله عزوجل - وكأن صاحبها قد فطن الى انه لم يقحم فى هذه الحياة بناء على طلبه او موافقة منه وإنما كانت الحياة بالنسبة له اختباراً من الوارد جدا ان لا يكون مؤهلاً له ، كما ان الاخرون قد وجدوا انفسهم مؤهلون بالصدفة لاجتيازه .

ومع ذلك أجد ذاتي عاجزاً عن كل الاختيارات ، عاجزاً عن انهاء اللعبة والرضا بالهزيمة "خوفاً من عقاب مجهول ينتظرني دون احتمال لرحمة او شفاعة ، أو حتى طمعاً فى أن اجتاز الاختبار بالصدفة" ، وعلى الوجه الاخر اجد ذاتي عاجزاً عن خوض غمار اللعبة متحملاً هذا الفراغ .. فراغ الكلمات .

صوتي اتنبح

كنت حالف يمين تلاته وشمال اربعه انى مااشارك فى اى نشاط سياسي فى بلدي العزيزة مصر ، وشايف برضو ان عدم مشاركتي دي مش سلبية أد ما هيا قمه المفهومية ، لأنك مش هاتاخد من الهم ده غير وجع القلب.

أصل هاغير ايه يعني ، دا حياني وحياكم الله مجرد صوت ، وأكيد مش هاييجي حاجه فى حركات بأكملها شوفتها وهيا بتثور وشوفتها برضو وهيا بتتوئد كأنثيات ما قبل الإسلام ، ومحركش فيا خالص مؤتمر من أجلك أنت ، ولا حتى كاسين أمم افريقية ، ولا حتى أغاني شادية ووردة ياحبيبتي يامصر ، وعـ الربابه ورده بتغني. وإن كنت حسيت بغيرة فـ قلبي ومتهيألي وصلت لدرجه الحقد كمان اما تابعت بشغف مجريات الانتخابات الأمريكية ، واللى كانت فيها لجنه مراقبة دولية مصر ممثلة فيها ، رايحين نراقب ونشوف مدى نزاهة الإنتخابات الأمريكية - عظيمة يامصر يارض اللوا !!!.

وصادفت فتره القيد في الجداول الإنتخابية ( نوفمبر 2009 : الخ يناير 2010 ) اتفرجت على سلسة على الانترنت اسمها القادمون بتتكلم على الماسونية الصهيونية وتشكيلها ما يسمى بالنظام العالمي الجديد The New World Order ومدى تأثيرها في مجريات الأمور فى كافة المجالات فى مختلف اقطار المعمورة ، واللى مصر بصفتها الإقليمية والسياسية والتاريخية والملوخية جزء مهم جدا في النظام دا ، وبما أنى بتمتع برعوية البلد دي - على حد تعبير دكتور عنايت قانون دولي حقوق قاهرة وأقاليم وإذاعة القرآن الكريم - فشعرت انى لازم اشارك فى الحدث الجلي دا ومش بهدف التغيير لا سمح الله أو بنية صافية كده تجاه منحنى سياسي افضل لبلدي وليعاذ بالله ، بصراحة مايرضنيش اعكر صفو الفساد مابحبش اصطاد فى المياه العكره ، إنما علشان ابقى رخمت على النظام العالمي الجديد ووقفت فى وشه وقولتلة عندك مش وانا موجود - Not In My Shift -

وكمان لقيت ناس كتير بصراحة عاملة شغل كبير جدا على الفيس بوك - ودعاية - وحماسة تغيير - ومقالات برادعي وعمرموسى ، وعلى فرض ان هاعتبر دعوتهم دي كويز سياسي نتيجته سؤال ياترى صوتك ليه لازمه ولا لأ ..؟ ، فقررت بعزم وبرخامه لا تخلو من التباته انى اطلع البطاقة الانتخابية ، وقبل اما اعمل ده طبعا بحثت على الانترنت ونزلت حوالي عشر قوانين ولائحتهم التنفيذية وتعديلاتها فيما يسمى بقوانين الإنتخابات أو ممارسه الحقوق السياسية ، وتوكلت على الله ونزلت علشان اقيد فى الجداول الانتخابية.

توجهت لقسم شرطه امبابة <قسم الجداول الانتخابية> ، الموظف قالي ياااه للأسف ياستاذ انت دلوقتى تبع قسم العجوزة ، - ماشي ياريس بس انت الاول متأكد ..!! أصل بطاقتي مكتوب فيها انها تبعكوا ، قالي اسمع المفيد انت تبع العجوزة ، - قولت فـ عقل بال واحد واقف جانبي .. مش مشكله امبابة من العجوزة ايه يعني مافرقتش كتير ، وروحت على قسم العجوزة ، الموظف قالي .. شوف النصيب أهو منطقتك دي كانت لفترة كبيرة تابعة لمركز كرداسة انما الحمد لله بقت تبعنا هنا عدا جداول القيود الانتخابية لسه موجوده فى مركز كرداسة وعليه لازم تروح تقيد هناك ، - أخخخ يانهار ابيض كرداسه ايه بس دا مشوار . ياللا معلش اهو كلو فدا مصر.

جايلك يام العواجز ، وبعد كام يوم روحت مركز كرداسة بصراحة قسم نضيف نضيف نضيف ومافهوش أى لبش ، الموظف ضحك وقالي اخيرا حد جه يسأل على الانتخابات انتو مابتحبوش البلد ولا ايه .. - قولتلو وحياتك عاشقها ، قالي طيب شوفت بقى ياعم العاشق ان العشق بهدله ، وانت شكل حظك مش ولابد ، مواليد 1985 تحديدا وما قبلها جداول القيود الانتخابية بتاعتها فى قسم محل الميلاد مش محل الإقامة ، - قولتلو بجد حرام انا كده واخدها كعب داير ، قالي انت تصلي بينا عـ النبي ( عليه أفضل الصلواة وأتم التسليم وعلى اله وصحبه اجمعين ) وتروح قسم بولاق ابو العلا التابع له محل ميلادك بولاق ابو العلا ، قاهرة المعز قبل ماتدخل على أركاديا موول يمين لان شمال ماقودماكش إلا النيل - هاتلاقي نفسك مقيد هناك كمبيوتر ( بشكل آلى راديكيلي اكتواري يعني ) لو مالقتكش متقيد هناك تعالالي بقى نروح بيك على العمده ونعملك طلب قيد من أول وجديد بس لازم تكشف الأول فى الجدول بتاع القاهرة - عمده هو لسه في عمد فى البلد - ما علينا مصر برضك تستاهل.

روحت قسم بولاق ابو العلا قالتلي الموظفة فعلا انت مقيد عندنا وخلاص كده شوفت الحكاية سهله ازاى مش عارفة انا الناس مش عايزة تيجي تقيد ليه ..؟ - قولتلها علشان الحكايه سهلة فعلاً - لو سمحت سلميلي بقى البطاقة الإنتخابية - قالتلي لا التعليمات صادره لينا ان مافيش بطاقات إلا بعد مواعيد القيد إللي بتنتهي اخر يناير ومواعيد الطعون اللى بتنتهي اخر مارس وحضرتك تشرفنا كده تستلمها أول ابريل.

بابتسامه صفرا مفتعله ارمقت بها الموظفة إللي اكيد تستاهل اكتر من كده طالما هيا كمان بتخضع لجنسية مصرالعزيزة ، ومشيت وفى دماغي شكوك انى مش مقيد فى الجداول الانتخابية ولا حاجه وان الست دي بتضللني علشان تضيع عليا الانتخابات وزي مارمقتها بابتسامه فاتره تقابلني هيا بعد ما يسبق سيف -الهزل- العزل وتقولي علشان يبقى صوتك ينفعك أوى واجى أرد عليها الاقي صوتي منبوح - وفكرت كمان اشيل كل القوانين اللى انا نزلتها واللى مافيش بندين فيهم يوحدوا ربنا موجودين على ارض الواقع او حتى على ارض الجمعية اللى فى امبابه.

وبعدين قولت لا ياواد وحد ربنا سيف ايه وعزل ايه ومش مقيد ايه انت فى مصر يعني كل حاجه ماشية بالظبط ومافيش هزار ، ومن هنا لأول ابريل أو حتى بعد الانتخابات الرئاسية اللى 2011 يحلها ربنا ، وبعدين على رأي شادية أصلو ماعداش على مصر .. لانه لو كان عدا كان حالنا بقى غير كده.

مِئة سُعرْ عاطفي.

أم كلثوم ،،، صوتها بياخدني لجوايا ، وبيدخل لأماكن بعيده داخل قلبي يعجز عقلي عن الوصول ليها. ولما تيجي الفرصه وتتعمل حفلات محاكاه لجو الحفلات الحقيقية لأم كلثوم تعرف أد ايه الناس ساعتها كانت محظوظه بيها ، والفرصه دي وان كانت مسرح عرايس فى ساقية الصاوي ، وان كانت بتاخدك لعالم الكلمات العذبه الرقيقه وابداع رائع للألحان يفوق الوصف ، فهي ماكنتش تقدر تملا احساسي وتغمرني بنشوة الحياة اللى شعرت بيها إلا "بوجود حبيبتي جنبي" .

طيب واما ابتدي ابتدي بمين ..!!

ابتدي بأم كلثوم ..
ياسلام على ام كلثوم ، ووقفتها على المسرح بعد عشر دقايق قاعده بكل احترام على كرسي خشب بسيط ، وفرقه مُلك وآخر سلطنه قاعدين على الناحيتين منها وعلى يمينها القصبجي منكب على عوده وحاطط رجل على رجل ، ولو الأغنية قديمة هاتشوف الصورة مموجه ، وتشوف الجمهور بيتمايلوا على انغام الموسيقى ، وهات ياآهات وهتافات رهيبة من مع نبرات صوتها وآهاتها، وعظمة على عظمة على عظمة ياست.

وانا صغير كنت بكره أم كلثوم .. نعم بتكره أم كلثوم هو في حد بيكره ام كلثوم ؟ - أيوه انا بكرهها. أولاً: يعني ايه حد عندو خمسين ستين سنه وواقف بيغني وجايبنلها كرسي كمان علشان لما تتعب تبقى تتسند عليه وكل المغنيين اللى بنشوفهم على ايامنا حيانا الله كلهم عشرينات ، ثانياً: يعني ايه حد يقعد يغني ساعه كاملة فى اغنية واحده الناس دي فاضيه ولا ايه ، وايامنا الالبوم كاملا مابيعملش نص ساعه اصلاً ، وأيه المنديل ده ، وهلال غريب موجود على صدرها ، وابيض واسود كمان ، ومابتعملش كليبات.

أيون أنا بكره ام كلثوم ،، وترد عليا أمي ردها المعتاد اللى كلو ثقة - طيب اسكت يابابا ماتقولش الكلام ده قُدام حد بيفهم علشان مايضحكش على خيبتك.

وامشي فـ حياتي !! اسمع كتير واشوف اكتر ، وافضل استغرب ، كل الناس اللى اعرفهم بيعشقوا ام كلثوم ، دي هرم رابع ، دي كوكب الشرق ، واشوف عبد الحليم وهو بيبوس ايديها ، وعبد الناصر وهو بيسلم عليها ، ايه ياناس هو انا كافر ولا ايه ..!! الست دي مين..!!؟

ولما كبرت شويه .. تخطف وداني أه من آهات ام كلثوم اللى بتطلع من جوه أوى دي .. تشدني ! أبقى عايز اعرف بتقول ايه .. أركز فى كلامها الاقي الكوبليه تحفه . ايه الموسيقى دي ..!!؟؟ مين اللى عاملها ؟ - دا بليغ حمدي - الله جميله جداً والكلمات رائعة - اتفرج على فيلم هيستيريا لأحمد زكي (الله يرحمه) .. يغني فى اخر الفيلم .. وصفولي الصبر ، لقيته خيال ، وكلام فى الحب ، كلام الحب ، يادوب يادوب ينقال ، أهرب من قلبي أروح على فين ليالينا الحلوه فى كل مكان ، مليناها حب إحنا الأتنين ، وملينا الدنيا أمل ، أمل ، أمل وحياة - الله على دا كوبليه - أسأل أمي هيا الحته اللى بتقول وصفولي الصبر فـ أي أغنية لأم كلثوم ..؟ - اسمها ودارت الأيام - طيب ،واجري اشغل الأغنية وادور على الكوبليه ده واسمعه ، أتفرج على فيلم اسكندرية كمان وكمان ، يرقص عمر عبد الجليل على موسيقى رائعة .. ها ودي تطلع ايه ..؟ - دي انت عمري - مين اللى عاملها ؟ عبد الوهاب. ومن هنا لهنا ابتديت اهتم واجمع كوبليه من هنا على واحد تانى من هناك لحد أما عرفت قيمه أم كلثوم وبقيت بسمع أغانيها.

أما كبرت انا بقيت بموت فـ أم كلثوم ، الف ليله وليله ، انت عمري ، الحب كلو ، والاطلال ، وحكم علينا الهوى .. وخزين اعجابي بأغانيها ابتدى يكبر ويتملي ، وأما اخويا الصغير - 13 سنه - قال انه مابيحبش ام كلثوم .. وكرر كل اللى كنت بقولو عليها بالظبط ، ضحكت أمي وقالت انا ربنا مديني فى عيالي وقالتلي استلم ياعم التاني جايلك اهو قولو حاجه .. !!

أم كلثوم دي يابنى من الاخر كده مالهاش حل ، ام كلثوم يابابا لوكانت عايشه دلوقتى اصلا كانت الناس اللى بتغني دول زمانهم قاعدين في بيوتهم - تدخلت أمي فـ الكلام وقالتلي لأ كانت هاتموت كده كده من القرف اللى بنسمعو - وياسلام بقى قبل اما تيجي تنام كده وتروح فاتح الراديو على أغنيه لأم كلثوم وتسمع المقدمه الإذاعية اللى بيقولها حد صوته هادي جدا واللى تحس معاه أد ايه كانت مصر كلها مستنياه وهو بيستعجل فى الكلام وينبه على ان دقات المسرح بتعلن عن بدء وصلة الحفل الأولى ، وياسلام كمان اما كنت تشوف فى الافلام القديمه البيوت كلها وهيا مكهربه اول خميس من اول كل شهر وهيا مجهزه الذي منه لزوم السهره ، بتجمع مصر - أم كلثوم صوت مصر.
--------------------

ساقية عبد المنعم الصاوي ..
إسمها غريب أوي .. يعني أيه ساقية ..؟ - وكان الجواب ساقية لأنها تُسقي علماً وفناً وابداعاً - مكان جميل ، وأهم حاجه فيه ويارب تدوم هو الإهتمام بالقواعد والنظام اللى بيسري فى المكان - ممنوع التدخين مانعا باتاً - وييجو الناس بتوع الأمن ويقولوا لحد بيدخن لو سمحت اطفى السيجاره تلاقيه مستغرب كده ومستهجن الطلب - وحفلات عمر خيرت اللى كانت ملاذي من قسوة الحياة ومن ألم الوحده - وندوة او تنين لحاجه انت مهتم بيها - وناس مابتبطلش شغل وتجديد واحداث متنوعه ومن كل الثقافات - وسينيما كمان بس كان ياسلام ع الجمال لو يعرضوا افلام البوست اوفيس - ومحمد عبد المنعم الصاوي مؤسسها شخص متواضع دؤوب دايماً على العمل والتجديد وتعب فعلا فى ماتش مصر والجزائرالأليم سنه 2009 من كتر التشجيع والمحايله على الشباب بلاش صواريخ - ويصادف تررددك على المكان وحيد تمارس مختلف الانشطه بمفردك ويجيلك واحد صاحبك من زمان ماشوفتوش وبيفكرك بأيام حلوه أيام الثانوي لأنك قابلت فيها ناس مميزين جداً وتاه منك مع الايام اللى تاهت وفضل طيفه فى اللاوعي - وتاخد صاحبك وتروحوا تقعدوا فى الساقية - وتتفرجوا على مباريات مصر - ويلح صاحبك بحكم جرائتة على استجلاب الماضي البهيج - ويتصل بالناس ، وتتقابلوا فى الساقية ، وتقربوا شويه ، وتتوالى الأحداث وتكون الساقية وشها حلو عليك علشان هاتلاقي حبيبك ويلاقيك ويجمع لقاه جمال وروعة الماضي مع ديناميكية الحاضر وتكون من الساقية بدايتكم .

وتمر ايام ، وتجمعنا حفله ام كلثوم فى الساقية أنا وحبيبتي ..

صوت اذاعي جديد ، يقدم العرايس ، بنفس الحماس اللى كانت بتتقدم بيه ام كلثوم ، ويتفتح الستار على الماريونيت ، وتبتدي احلى موسيقي واعذب كلمات فى وجود أغلى البشر على قلبك جنبك ، وتشد على ايديها لم تقول ام كلثوم .. أنا كنت ايه قبل اما اشوفك ، كنت ايه ، وكنت عايش ياحبيبي ايامي ليه ، ايامي ليه ، طريق حياتي مشيته قبلك فى ليل طويل ، لاقلب جنبي يحس بيا ولا طيف جميل. وتشم عطر حبيبتك وصوت ام كلثوم وقلبك نبضاته تزيد وكأنه اتملى بـ 100 سُعر عاطفي

وتمني خيالك بالفناء معهما فى ثنايا نشوة الأبدية والخلود.